懶人部落

今日爸爸如常地番工，如常地工作，直到下午三時收到婆婆的電話，話龍龍係學校嘔，跟住番到屋企又冇胃口食野，之後又嘔左一次添～～爸爸即刻攞假番屋企同龍龍睇醫生～

番到去見到龍龍都冇咩精神坐左係度，跟住同龍龍講去睇醫生，龍龍都好乖～～

入左電梯諗住俾龍龍瞓下休息下，點知未落到大堂龍龍又嘔，即刻要番屋企換衫先再出發～

去既途中坐的士，但龍龍已經唔知嘔左幾多次，最慘係嘔到冇野可以嘔都仲想嘔，最後連胃液，黃膽水都嘔埋出黎，爸爸同婆婆都好擔心～

到見醫生時，醫生話本來可以選擇打枝針番屋企休息或者住一晚醫院吊鹽水，就係呢個時候龍龍又嘔，醫生都話建議佢留一晚睇下情況，於是即刻安排入院～～

中途龍龍繼續嘔個不停....到上左樓都仲嘔，好彩開始吊藥水之後情況有d好轉～

吊既時候爸爸同婆婆都唔可以入去陪龍龍，龍龍捉住爸爸唔肯放手，但為左快d好番都冇法～不過吊完姑娘話龍龍好叻，完全冇喊到，仲同姑娘傾下講下係邊度番學添～～

跟住媽媽都好快到，但龍龍都係冇咩精神，淨係可以係床度休息。好彩間房環境好好，又得龍龍一個，可以好好休息唔駛怕俾人嘈親～

吊完藥之後姑娘話個驗血報告出左，龍龍既白血球數量比正常高，即係已經受到感染，醫生話要再加抗生素，好彩我地決定左俾龍龍留院一晚～～

吊左一輪之後龍龍太累，終於瞓左一陣～～

爸爸媽媽趁呢個時候番屋企換衫同拎野俾龍龍～再順便買晚餐食，不過係買緊既時候龍龍醒左，仲即刻要婆婆打俾我地問我地幾時番去添～

之後公公同姨姨都黎埋，由於醫生話龍龍唔可以食同飲水，我地都係房外面食完先入去陪龍龍～

夜晚爸爸媽媽留係醫院陪龍龍，但到瞓既時候先發覺冇帶一樣好重要既野....龍龍個奶咀...

於是爸爸要飛的番屋企拎，點知番到去又發覺開唔到鐵閘，因為婆婆好好手尾鎖左，而爸爸又冇帶Orz...於是唯有叫公公落黎開門俾爸爸，再拎多幾隻DVD俾龍龍睇，跟住又飛的番醫院啦～

龍龍雖然好累，但都等埋爸爸個奶咀先瞓得到～